Iż-żmien tal-Avvent mhux biss ifakkarna li aħna Nsara li ninsabu fi proċess ta’ stennija – l-istennija għat-tieni miġja ta’ Sidna Ġesù fl-aħħar taż-żminijiet – imma wkoll aħna Nsara li għandna dejjem iżjed nirrealizzaw li mingħajr Alla fil-ħajja tiegħu “il-bniedem huwa ħaxix, u sbuħitu bħal ward ir-raba’ […] il-ħaxix jinxef, u l-ward jidbiel, iżda l-kelma tal-Mulej tibqa’ għal dejjem.”
L-Avvent huwa żmien, l-ewwel u qabel kollox, ta’ konverżjoni, dik il-konverżjoni tal-qalb tagħna li permezz tal-ħajja kollha tagħna nikkwitaw il-passjonijiet kollha tagħna u nistrieħu f’Alla. Kemm-il darba fit-talb ħassejna li għandna bil-fors nużaw ħafna kliem biex nesprimu dak li aħna naħsbu jew inħossu dwar Alla? Madanakollu, kif tgħallimna Santa Tereża ta’ Ġesù, l-għalliema l-kbira tat-talb, it-talb mhuwa xejn ħlief li nkun waħdi fi djalogu kollu mħabba ma’ dak li qiegħed waħdu. It-talb, tgħidilna, mhuwiex tant dak li nagħmel jien, iżda pjuttost huwa dak li Alla jagħmel miegħi u kemm jien qiegħed inħallih jagħmel dan fil-ħajja tiegħi. Il-konverżjoni, kif toħroġ mil-Liturġija tal-Kelma tal-lum, turina lil dan Alla, li huwa r-Ragħaj it-Tajjeb, li jħalli lin-nagħaġ kollha l-oħra biex jiġi jfittixna hemm fejn ninsabu mitlufin, imħawdin, u mxerrdin. L-ewwel pass fir-relazzjoni tagħna ma’ Alla għandu jkun li ninfetħu, nibdlu t-triqat tagħna – il-konverżjoni – biex minflok jien isir Alla s-Sid ta’ ħajti, Hu li diġà qiegħed ifittixni biex ireġġani lura l-maqjel fuq spalltu.
Il-konverżjoni, mela, hija l-ewwel u qabel kollox proċess sabiħ ta’ ritorn, bħall-iben il-ħali li reġa’ lura lejn dar missieru. Hija mixja ta’ abbandun u tama sħiħa f’dak Alla li jaf x’inhu l-aħjar għall-ħajja tagħna u li diġà qiegħed ifittixni u jistaqsi l-istess mistoqsija bħalma staqsa lil Adam fil-Ġnien tal-Għeden: “Fejn int?”
Go Ahead, Leave A Comment