Il-kelma Avvent tfisser miġja u żmien l-Avvent jiftaħ is-sena liturġika tal-Knisja li mbagħad tagħlaq bil-festa ta’ Kristu Sultan, hekk li f’tul ta’ sena aħna bħala dixxipli ta’ Ġesu nġeddu l-misteri tas-Salvazzjoni tagħna, sabiex dawn il-misteri nħalluhom jibdluna bil-mod il-mod sa ma jiġi l-Mulej fit-Tieni miġja tiegħu fl-aħħar taż- żmien.

L-Avvent mhuwiex sempliċiment tħejjija għall-festa tat- Twelid ta’ Sidna Ġesu Kristu, imma iktar minn hekk huwa żmien li fih aħna niftakru li ħajjitna hi kollha kemm hi stennija għall-Mulej li ġej: Inħabbru l-Mewt tiegħek Mulej, inxandru bil-ferħ il-Qawmien tiegħek, NISTENNEWK sa ma’ tiġi fil-glorja.

Ejjew f’dan l-Avvent nidħlu f’dan l-ispirtu ta’ stennija tassew, bis-sens, mhux stennija frivola ta’ festa li tiġi u tgħaddi. Nistennew bil-ħerqa u bil-ferħ tassew, kif jgħidilna Isaija fl-ewwel qari ta’ llum nistennew billi fl- istess waqt inħaffu biex immorru niltaqgħu mal-Mulej li ġej biex jeħodna miegħu… kif tgħid li tħobbu, jgħallimna Santu Wistin, meta tibża’ mill-jum li fih Sidek jiġi biex jieħdok miegħu għal dejjem!

Tistenna tfisser li tkun imħejji, tkun lest, bil-Malti ngħidu “kont qed nistenniha” għal xi ħaġa li sseħħ quddiemna hekk malajr bla avviż. Hekk għandha tkun l-istennija tagħna, biex ma teħodniex għall-għarrieda bħal fi żmien Noe.