Il-Kelma ta’ Alla llum tikkonfrontana b’żewġ azzjonijiet: dur u isma’. It-tnejn li huma jindikaw moviment, ċaqlieq.

Il-Profeta Hosegħa fl-ewwel qari tal-Quddiesa ta’ llum iwassal il-Kelma ta’ Alla li tistieden lil Israel, imqabbel ma’ mara adultera fir-relazzjoni mar-raġel tagħha – tant hu hekk li fil-bidu tal-ktieb ta’ Hosegħa nsibu lill-profeta li fuq l-amar ta’ Alla jiżżewweġ prostituta sabiex ikun sinjal tal-poplu li ttradixxa lil Alla – sabiex idur lejn Alla.

Aħna mdorrijin nużaw il-kelma “konverżjoni” li tfisser proprju hekk li ddawwar qalbek. Alla wkoll jgħid fuqu nnifsu wara li jinkorla għall-infedeltà li toffendi mħabbtu, “daret għalija qalbi” għall-poplu tiegħi, u mill-korla hu jitfa’ l-ħniena. Li ddawwar qalbek jimplika l-ewwelnett li tiftakar fil-jiem li fihom, biex nużaw l-istess terminoloġija biblika, innamrajt ma’ Alla, iż-żmien li fih inġbidt lejn Alla, iż-żmien li fih iddeċidejt li Alla jkun parti minn ħajtek. Ġesù jikkwota l-kmand tad-Dewteronomju li jiftaħ bis-sejħa għas-smiegħ: “Isma’ Israel”. Li tħalli qalbek iddur, tiddisponiha biex tisma’, f’dan il-każ tisma’ lil Alla u tagħtih widen. Il-kmand tad-Dewteronomju jgħidilna kif għandna nħobbu lil Alla u lil għajrna. Alla jagħtina indikazzjonijiet ta’ kif inħobbu lil Alla u lil xulin, għax bil-ħila tagħna biss, imħabbitna u kelmitna hija bħal dik tal-mara adultera ta’ Hosegħa, tal-mument, qasba tixxejjer mar-riħ, ibbażata fuq dak li nħoss fil-mument. Għalhekk neħtieġu l-kuraġġ li “nduru” minn triqatna, mill-mentalità tagħna u “nisimgħu” lil Alla jindikalna kif għandna nimxu miegħu u mal-oħrajn. Li ddur u tagħti widen ifisser li għandek il-kuraġġ toħroġ minnek innifsek, milli tiffissa fuq il-bżonnijiet tiegħek u tifhem u tagħti każ tal-ħtiġijiet tal-oħrajn.

Nitolbu lil Alla dan il-kuraġġ li tant hu nieqes fid-dinja tagħna li timlina bil-mentalità li nkunu ego-ċentriċi, magħluqin fina nfusna.