Id-drawwa tal-Eżerċizzi fiż-żmien tar-Randan hija opportunità tajba sabiex wieħed jisma’ l-Kelma ta’ Alla fi spirtu ta’ riflessjoni u valutazzjoni tal-ħajja. F’dan il-kors ta’ Eżerċizzi, se nerġgħu inżuru d-drawwa tal-Knisja tal-bidu dwar il-proċess tal-Iskrutinji għal dawk l-adulti li waslu għall-konverżjoni u kienu qegħdin jitħejjew għall-magħmudija. Dan il-proċess kien mibni fuq it-tliet vanġeli li jixxandru fit-tielet, ir-raba’ u l-ħames Ħdud tar-Randan. Il-Konċilju Vatikan II, ħeġġeġ lill-Knisja sabiex nerġgħu niskopru r-rabta tar-Randan mal-Magħmudija kemm għall-Katekumeni kif ukoll għall-dawk li diġà mgħammdin. Għaldaqstant f’dan il-kors eżerċizzi sejrin niddisponu ruħna biex inħallu lil Ġesù jgħarbilna bil-Kelma tiegħu u jfejjaqna minn dak kollu li jżommna mxekklin fil-mixja tal-fidi.