Il-Profeta Ġeremija baqa’ magħruf għal-Lamentazzjonijiet jew il-krib tiegħu għal Ġerusalemm il-belt ta’ Alla u tas-Sliem, li ġiet meqruda minħabba l-infedeltà tagħha lejn Alla u lejn il-Patt li hu għamel mal-poplu tiegħu. Fil-qari ta’ llum, Ġeremija josserva li minkejja l-fedeltà ta’ Alla mal-poplu tiegħu, dan il-poplu mar lura flok ’il quddiem, donnu Alla u l-Profeti tiegħu għażqu fl-ilma u saqqew il-blat!

Tajjeb nistaqsu fuq livell personali  kif ukoll soċjali u komunitarju bħala Knisja: aħna fil-mixja tal-fidi, sejrin lura jew ’il quddiem? Sejrin dejjem għall-aħjar jew pjuttost għall-agħar?

Bħala Knisja f’Malta għandna ħafna ċelebrazzjonijiet, magħrufin għall-ħeġġa missjunarja, il-karità fi xtutna u barra minnhom, ħafna attività marbuta mal-fidi… imma qatt staqsejna fejn sejrin, ’il fejn mexjin? Alla magħna, meta jħares lejna x’jgħid? Għażaqt fl-ilma, jew dawn uliedi l-għeżież li fihom insib l-għaxqa tiegħi? Ġesù fl-evanġelju ikeċċi xitan imbikkem. Dan hu dak li jagħmlilna x-xitan u l-ħażin: ibikkimna, jagħmilna inkapaċi nikkomunikaw magħna nfusna, ma’ Alla u mal-oħrajn. Xi ħadd imbikkem hu xi ħadd li ma jistax jitkellem, ma jistax jikkomunika u allura huwa maqtugħ għalih innifsu.

Nistaqsi: jiena mbikkem ma’ Alla, miegħi innifsi u mal-oħrajn… ma’ dawk l-iktar qrib tiegħi? Jekk inhu l-każ, naħseb wasal iż-żmien li nirrevedu l-prijoritajiet tagħna u nqegħdu ftit darna f’postha.