Mit-tielet Ħadd tal-Avvent, dan iż-żmien liturġiku jibdel it-tonalità. Minn żmien li fih nirriflettu fuq it-tieni miġja ta’ Kristu fl-aħħar taż-żmien, jinbidel fi żmien li fih inħejju ruħna għall-Milied. Il-vjola jinbidel f’roża u t-ton penitenzjali jinbidel f’wieħed ta’ ferħ li jasal fil-milja tiegħu dakinhar tal-Milied.

Il-Profeziji wkoll minn kelmiet ta’ tama jinbidlu fi kliem ta’ ċertezza bħal fil-qari tal-Quddiesa ta’ llum mill-Ktieb tan-Numri. Dan il-ktieb, ir-raba’ wieħed fil-Bibbja Lhudija jiftaħ bil-poplu taħt is-Sinaj, meta Alla għammar fosthom u jaqgħlaq bil-poplu Lhudi li lest jaqsam minn Moab għall-Ġordan biex jidħol fl-Art Imwegħda. Il-Ktieb tan-Numri għalhekk huwa l-milja ta’ dak li Alla wiegħed fil-Ġenesi –għotja tal-art-, u dak li beda fl-Eżodu –ħelsien mill-jasar-. Balgħam, il-bniedem tad-dehriet jara dak li għadu fil-bogħod, u jilmaħ ġej lil dak li għadu ma deherx. Huwa qed jitkellem dwar ħakkiem li jaħkem fuq Edom u Mowab. F’din l-espressjoni poetika, hemm imniżżla r-realtà tal-messaġġier ta’ Alla li minn qabel jara u jilmaħ dak li l-bqija tal-bnedmin ma jarawx.

Il-viżjoni tal-profeta tmur ’il bogħod quddiemu u jara il-futur ta’ Alla għall-poplu tiegħu. Il-profeta xi ftit hu ħalliem, ħalliem mhux fl-arja iżda ħalliem li joħlom il-ħolma ta’ Alla għall-poplu tiegħu. Inti x’taħseb li hi l-ħolma ta’ Alla għalik?